الصفحة السابعة : ديجاڤو

ديجاڤو هى حاله او ظاهره نفسيه و ذهنيه تحدث لكثير منا. هى ليست بمرض او لها علاقه بتاتا بأى مرض نفسى بحسب وصف علماء علم النفس وإن كان هناك تشابه فى بعض الاعراض مع مرض صرع الفص الصدغى للمخ. ديجاڤو كما وصفها فرويد هى ظاهرة خارقه للطبيعه بكل المقاييس، لكن فى مصر ديجاڤو حاله يشعر بها المصريين كثيراً هذه الآونه الاخيره مع بدأ الثوره.
كعادتى حاسس انى بتكلم كلام غريب فهاحاول اتكلم بالعاميه اسهلى من كلاكيع الفصحى للأسف! اللى احتمال تلاقونى بتكلم بيها برده من غير ما اشعر !
موضوع الديجاڤو زى ما تم تقسيمه إما ديجاڤو الرؤيا ، أو ديجاڤو الشعور ، أو ديجاڤو الزياره يعنى احيانا بتكون بتتفرج على فيلم او ماتش او برنامج وتحس انك شفتهم قبل كده بنفس تفاصيل اللبس والالوان والكلام ..... أو مثلاً تروح مكان جديد زى مطعم او قهوه و تحس انك جيته قبل كده وعارف كل دهاليزه و خباياه ... وأخيراً ممكن تحس احساس جديد عليك زى إحساس بألم او مرض أو عاطفه او خوف وبرده تفتكر انك مريت بنفس الاحساس... علشان مطولش عليكم فى شرح سيكولوجى انشطارى معقد نخش بقه فى ديجاڤو الشعب المصرى والثوره.....
للتسهيل والتوضيح هانقسم فترة الثورة اللى هى لسه مستمرة بالمناسبه الى وقتنا هذا الى 3 فترات او مراحل بحسب الحاكم وهم:
1- مرحلة مبارك
2- مرحلة المجلس العسكرى
3- مرحلة الدكتاتور مرسى

وهانقسم الاحداث الى عدة أجزاء وهم :
1- المظاهرات السلميه
2- رد الفعل الغير آدمى
3- الشهداء
4- الحرق والإتلاف
5- المخابيل والمضطربين نفسيا
6- السقطات التقسيمية


الآن سوف نقوم بتوفيق كل جزء من الأحداث التى عاصرناها بالدلائل والبراهين الدامغه الساطعه اللولبيه فى كل فتره او مرحله.

ما سيأتى لاحقاً محظور على اصحاب الأمراض الآتيه:
1- البارانويا
2- الفصام
3- المطبلاتيه
4- كلاب السرايا


 1- المظاهرات السلميه:

المرحله الأولى : مرحلة مــبارك:
 بدأت منذ الدعوه للخروج والمطالبه بحقوقنا المشروعه المسلوبه فى عهد مبارك ونظامه البائد، نزلنا ولبينا الدعوه وبدأنا بأعداد محدوده كالعاده ولكن الجديد وقتها ان الأعداد المحدوده كانت على مستوى اكتر من منطقه واكتر من محافظه على مستوى مصر. نزلنا سلميين وشعارنا سلميه سلميه ... ودى كانت من اهم المحفزات لناس كتير اوى انها تشارك وتنزل وتقتل الخوف اللى جواها  فى مواجهة الظلم و الاستبداد وقمع الحريات.

المرحله الثانية : مرحلة المجلس العسكرى: 
بدأت منذ الدعوه للخروج والمطالبه بحقوقنا المشروعه المسلوبه فى عهد المجلس العسكرى عندما خرجت المظاهرات السلميه كعادتها لتطالب المجلس العسكرى بتنفيذ وعوده بتسليم السلطه و محاكمة قتلة الثوار و إسقاط الحكومه وغيرها من المطالب و بكل إحترام و ثقه فى المجلس العسكرى الذى بدأ تسلمه للسلطه بتحيه للشهداء.

المرحلة الثالثة : مرحلة الدكتاتور مرسى: 
 بدأت منذ الدعوه للخروج والمطالبه بحقوقنا المشروعه المسلوبه فى عهد الدكتور مرسى فخرجت المظاهرات السلميه برده لإحياء ذكرى محمد محمود و لتذكير النظام اننا لن ننسى حق الشهداء فى مشهد رائع اعاد لنا ذكريات الثورة والميدان.

2- رد الفعل الغير آدمى:

المرحله الأولى : مرحلة مــبارك: 
فى محاوله فاشله و فاشيه و يائسه لردع الناس والحقوق والحريات المطالبه بإسقاط النظام المستبد بكل جذوره و مموليه، اصبحت الردود اعنف واشد من ضرب وسحل وغاز و حجارة و مولوتوف و تعذيب الى القتل العمد وبدون اى مقدمات او اسباب!
هذا الرد إن نم على شىء فهو ينم عن مدى الخوف و الى اى مدى وصل بهم الطغيان ان يقتلوا ابناء وطنهم واخوتهم و جيرانهم وبلدياتهم... فمع أول إصابه ايقنا انه لا تراجع ولا استسلام عن هذه المهمه التى كانت فى البدايه شبه مستحيله وانها لن تكون اخر اصابه، واننا من المتوقع ان لا نعود الى بيوتنا ولن نرى اطفالنا واهالينا مجدداً.. فكان رد الفعل الغير آدمى و الوحشى والذى يعاقب عليه جميع الشرائع السماويه و الانسانيه حتى قانون كفر ابو عجوه .

المرحله الثانية : مرحلة المجلس العسكرى: 
فى اكتر من محاوله لإغتصاب الثورة و الإلتفاف و المزايده و المحايله حاول المجلس العسكرى عابثاً ولكنه فشل. فاصبحت الردود أعنف واشد من ضرب وسحل وغاز و حجارة و مولوتوف و تعذيب الى القتل العمد وبدون اى مقدمات او اسباب!
هذا الرد إن نم على شىء فهو ينم عن مدى الخوف و الى اى مدى وصل بهم الطغيان ان يقتلوا ابناء وطنهم واخوتهم و جيرانهم وبلدياتهم ... نتذكر أحداث ماسبيرو ، محمد محمود ج1 ، أحداث مجلس الوزراء ، وغيرها. فكان رد الفعل الغير آدمى و الوحشى والذى يعاقب عليه جميع الشرائع السماويه و الانسانيه حتى قانون كفر ابو عجوه .

المرحله الثالثة : مرحلة الدكتاتور مرسى: 
فى محاوله فاشله و فاشيه و يائسه لردع الناس والحقوق والحريات المطالبه بالقصاص و العدل و المساواه بين الشعب و افراد الجماعه على الاقل المنزلين المنزهين عن كل خطيئه، فوجئنا ب3 ديجاڤو مره واحده، ديجاڤو الرؤيا للأحداث كر وفر وجدار عازل و ديجاڤو الشعور بالغازو الطوب و الخرطوش و الضرب و السحل و القتل وأخيراً ديجاڤو الزيارة للميدان والشوارع المحيطه كأنك فى فيلم خيال علمى.

  3- الشهداء:

المرحله الأولى : مرحلة مــبارك: 
ناس زيينا ، لا بيها ولا عليها، زهقت وطهقت من فرد اشباه القوانين من الطغاه عليهم بالقوه، مش لاقيه لقمة عيش تديها لولادها، مش عارفين يتعالجوا، مش عارفين يجوزوا ولادهم، الفقر والجوع بيقتلهم بالبطىء وهما شايفين ناس تانيه عايشه و بتسرق و بتنهب و بتقتل اى حد يقف فى طريقها وكانوا ساكتين وراضيين وبيقولوا الحمد لله. وناس تانيه بدون اى سبب غير انه بيقول الحقيقه فى مدونه او جريده مستقله حره او قناه فى تليفيزيون اتهان و اتضرب واعتقل واتعذب واتهتك عرضه و مات وقلب امه اتحرق عليه و اللى ابوه مقدرش يستحمل و مات و اللى اخواته او اولاده الاطفال بيسألوا عليه ويقولوا: ماما هو بابا هايرجع امتى من عند ربنا؟
وكل ده ومكنش مكفيهم.... وكل ده ولسه محسوش بالجبروت ... وكل ده وهما ناسيين ربنا تماماً... وماكفهمش بجاحه ولا تسلط ولا جبروت وبدأوا يقتلوا ناس طلعت تقول لأ. ناس زهقت ومللت من السكون ومن كونهم تابعيين ورعايا يسبحون بحمد الحاكم الإله.
فى الأحداث دى وقع عدد شهداء فى مصر كلها اكتر من اللى استشهدوا فى غزوات إسرائيليه على فلسطين المحتله!

المرحله الثانية : مرحلة المجلس العسكرى: 
ناس زيينا ، لا بيها ولا عليها، زهقت وطهقت من فرد اشباه القوانين من الطغاه عليهم بالقوه، مش لاقيه لقمة عيش تديها لولادها، مش عارفين يتعالجوا، مش عارفين يجوزوا ولادهم، الفقر والجوع بيقتلهم بالبطىء وهما شايفين ناس تانيه عايشه و بتسرق و بتنهب و بتقتل اى حد يقف فى طريقها وكانوا ساكتين وراضيين وبيقولوا الحمد لله.
وكل ده ومكنش مكفيهم.... وكل ده ولسه محسوش بالجبروت ... وكل ده وهما ناسيين ربنا تماماً... وماكفهمش بجاحه ولا تسلط ولا جبروت وبدأوا يقتلوا ناس طلعت تقول لأ. ناس زهقت ومللت من السكون ومن كونهم تابعيين ورعايا يسبحون بحمد المجلس الإله.
فى الأحداث دى وقع عدد شهداء فى مصر كلها اكتر من اللى استشهدوا فى غزوات إسرائيليه على فلسطين المحتله!
المغاير هنا فقط هو ان فيه ناس كتييييييييييييييير اووووووووى عينها راحت بالقصد وعن عمد ولسه الجانى على حد ذاكرتى مخدش اى حكم.

 المرحله الثالثة : مرحلة الدكتور مرسى: 
اييييه ... اقول ايه؟ بعد ما طلع على جثامين الشهداء ، و بعد خطاباته الممله التى تهرى فى اى خراء والسلام موضحاً انه لا مساس بابناء الوطن و حق الشهداء ، يحصل اللى حصل ؟ وبدون تعليق؟ او تبرير؟ او حساب؟ و اصبح المصابين يتساقطون بكل وحشية ولا إنسانيه و اصبح كلمة شهيد متوقعه الى ان سمعناها مرتين الى الآن. واصبحت الداخلية تقوم بدورها؟ واصبحت ذراعك الأيمن؟
 وأصبح ثوار التحرير معتدين وقاطعين طرق؟ ده ايه البارانويا دى؟ وايه الديجاڤو ده!!

 
  4- الحرق و الإتلاف:

المرحله الأولى : مرحلة مــبارك: 
فوجئنا بمحاولة حرق المتحف المصرى، وحرق مقر الحزب الوطنى، و أركاديا مول، وكارفور، وغيرها من الاماكن التجاريه والممتلكات العامه والخاصه بدءاً من يوم 28 يناير فى مخطط رخيص ومكشوف. ثم فوجئنا أيضاً ويا سبحان الله ان فجأه مبقاش فيه ولا عسكرى ولا ظابط ولا حتى كوموستبل واحد فى الميدان! وياللعجب بقه لما سمعنا عن فتح السجون وتهريب المسجونيين و أعمال التخريب والنهب والسرقه اللى شغاله على ودنه وبدون اى اسباب او مقدمات.. وقتها اتأكدنا ان احنا ماشيين صح ولازم نكمل طريقنا للآخر ومش هانرجع بيوتنا الى لما نخلع المخلوع مبارك ...

المرحله الثانية : مرحلة المجلس العسكرى: 
فوجئنا بحرق بعض المبانى و المجمع اللغوى اللى انا كنت بصراحه اول مره اسمع عنه بس عديها مش دى القضية، وسرقة مخطوطات واثار و دهب وياقوت و مرجان بس برده ديجاڤو.

المرحله الثالثة : مرحلة الدكتاتور مرسى: 
فوجئنا بحرق جزء من مدرسة الليسيه و الجامعه الامريكيه الخ الخ الديجاڤو ....



5- المخابيل و المضطربين نفسياً:

المرحله الأولى : مرحلة مــبارك: 
طل علينا بالشيزوفرانيا والبرارنويا فى آن واحد.. فهو الوحيد فى الكون القادر على تحليل مؤامرة البيبسى كولا و الكوكا كولا وشويبس إن لزم الأمر. هو العلامه العارف بالله نبغة عصره و أوانه المدهش الخارق الأخطبوطى " عموره القفه". بين ليله وضحاها اصبح هذا الكائن المخاطى اللزج المثير للشفقه والسخريه معاً فى آن واحد ايضاً رمزاً لقله قليله فضائيه ممن اتبعوه واتبعوا عويله ظاهره. فهو استطاع ان يجذب اليه بعض الحشرات الطفيليه كما يجذب الضوء الذباب و الناموس مع الإعتذار للذباب والناموس.
وقرر ان يكون مدافعاً عن الباطل وان لا يلتفت الى الحق وان يخطو بقدمه النجسه الدنيئه فوق دماء طهارنا، وسول له خياله المريض انه سوف يكون من الحاشيه والمقربين للفرعون الحاكم فيما بعد. ولكن هيهات ( حلوه اوى هيهات دى) أبى الله ان يتم مخططه وهزمته الثوره وهزمه الشباب الثائر الحق. فلم نسمع له صوت او ستقوم له قائمه تانى أبداً...ومات فى مصطفى محمود.

المرحله الثانية : مرحلة المجلس العسكرى :
طل علينا بالشيزوفرانيا والبرارنويا فى آن واحد.. فهو الوحيد فى الكون القادر على تحليل مؤامرة المجلس العسكرى و الإخوان و شفيق و مبارك والكائنات اللافقريه عليه. " عكشة". بين ليله وضحاها اصبح هذا الكائن المخاطى اللزج المثير للشفقه والسخريه معاً فى آن واحد ايضاً رمزاً لقله قليله فضائيه ممن اتبعوه واتبعوا عويله ظاهره. فهو استطاع ان يجذب اليه بعض الحشرات الطفيليه كما يجذب الضوء الذباب و الناموس مع الإعتذار للذباب والناموس.
وقرر ان يكون مدافعاً عن الباطل وان لا يلتفت الى الحق وان يخطوا بقدمه النجسه الدنيئه فوق دماء طهارنا، وسول له خياله المريض انه سوف يكون من الحاشيه والمقربين للفرعون الحاكم فيما بعد فأيد مبارك ثم هاجمه و أيد المجلس العسكرى ثم هاجمه وأيد شفيق ثم هاجم حملته الانتخابيه و بارك للأخوان واتهمهم بمحاولة قتله. ولكن هيهات ( حلوه اوى هيهات دى) أبى الله ان يتم مخططه وهزمته الثوره وهزمه الشباب الثائر الحق. فلم نسمع له صوت او ستقوم له قائمه تانى أبداً.... ومات فى المنصه والعباسيه
المرحله الثالثة : مرحلة الدكتاتور مرسى: 
طل علينا بالبورشام و الترامادول والتيرمال والإيفانول والعته المنغولى الحسى . هو "عريان"  فكرياً، "ملط" أدبياً ، وأبله "جداً".
فقد نعى هذا المبرشم، الشهيدين جابر صلاح (جيكا) وإسلام مسعود، قائلاً: ''رحم الله إسلام فتحي شهيد دمنهور، و(جيكا) شهيد محمد محمود، ضحايا نظام مبارك القاتل، أسأل الله أن يكونا آخر الشهداء وأن ينصر مصر الثورة على القتلة''. الله يخرب بيت البورشام اللى بيعمل فى الناس كده!

6- السقطات التقسيمية:       

المرحله الأولى : مرحلة مــبارك: 
سقطات مبارك كانت لا حصر لها، سقطات سياسيه و فكريه ... لكن لمتابعة سياق الحوار نتكلم عن خطاب تقسيم الشعب على سبيل المثال لا الحصر فقال سوف اموت وادفن فى هذه الارض "ده أكيد علشان مقدرتش او ملحتش او معرفتش تهرب وعارف نهايتك السوده" وكمان 6 شهور وانا او الفوضى إلى اخر هذا العك الخرائى المختى ومحدش يقولى يعنى ايه مختى!
المهم  انا اليوم ده كنت قاعد مع شوية ناس زى الفل مسجليين خطر فى اللجان الشعبيه و أقسم بالله هو قال حمى الله مصر وشعبها والخطاب خلص لقيت صوت مظاهرات فى ساعتها بتقول مبارك ومتمشيش إلى آخره. المشكله مش فى كل ده، المشكله ان قبل الثوره بأى فتره تحبها مكنش فيه اتنين يختلفوا ان مبارك لازم يتخلع ولازم يتحاكم والفساد والعنف وانتهاك حقوق الانسان بالتعذيب والاعتقال وفجأه بقدرة قادر سبحانك يا ربى بقت الناس عاوزاه يقعد!

المرحله الثانية : مرحلة المجلس العسكرى : 
الاستمرار فى سياسة التقسيم والتفريق فخلقوا مطبلاتيه لهم فى العباسيه شويه و المنصه شويه و ديجاڤو!


المرحله الثانية : مرحلة الدكتاتور مرسى: 
حتى البهايم اصبح لهم مكان غير الزريبه للتجمع! المهم قالك 235467 انا عارفهم بيعملوا حاجات وحشه فى حاره سد و هاكشف عنهم الغطاء و اللى بره وبيكلم حد جوه واى هرى فى الخراء برده والبهايم تقول تكبير! وبقى فيه اتحاديه وجنينة الحيوانات علشان يواجهوا التحرير بس برده هيهات. 

-----------------
موضوع غريب و حاله اغرب من التكرار و نفس النتائج ...
على كل الأحوال احب اقول فى الآخر لكى الله يا مصر ولنا الديجاڤو ..

الصفحه السادسة : تساؤلات!

وبعد طول غياب.. و مراقبة الوضع و الاحداث الراهنه لمده ليست بقليله فضلت فيها المشاهده و المشاركه عن الكتابه لتجميع صورة من منظور مختلف .. ظهرت فى دهاليز عقلى عدة تساؤلات لم أستطع الإجابه عليها حتى الآن ... وهذا ليس ضعف فى قراءة المشهد، ولكنى لا أستطيع ان اجزم بوجود إجابات من الأساس... هذه التساؤلات سوف تعيدنا قليلا الى الوراء، مروراً بعدة أحداث الى وقتنا هذا . هذه تساؤلات تحتاج الى توضيح لكشف الصورة أمام الجميع، ولست انا من سيجيب عليها، دورى هو إظهارها فقط....

أولاً: موقعة الجمل، لماذا لم يتدخل الجيش لفض الاشتباك بين طرفين كما فعل فى موقعة محمد محمود؟ لماذا أنتظر حتى سالت الدماء وارتفع عدد الشهداء والمصابين الى هذا الحد ؟ هل لإنتصار الثوار فى هذه المعركه صله؟ حيث انه كان ينتظر الطرف الفائز فى المعركه للإنضمام اليه؟
ثايناً: لماذا لم تتم قبول دعوة مخاصمة قاضى مبارك المستشار أحمد رفعت و رفضها بالرغم من كل الدلائل و الصور و المستندات التى قدمت ثانيا:لإظهار حقيقة علاقة أخيه بالحزب الوطنى و عائلة مبارك وهذا أيضاً بالرغم من تعليق القضيه وتأجيلها و البحث فى الطلب والدعوه كل هذه المده وفى النهايه تم رفضها لأسباب أقل إقناعاً من الحجج المقدمه؟ ولماذا لم يحاكم مبارك الى الآن ؟ والعادلى؟ والشاعر؟ وفايد؟ و رمزى؟ والباقى ! ولماذا يتم محاكمة المدنيين فى محاكم عسكرية فى أقل من 48 ساعه ولا يتم محاكمة القتلة والخائنين لتراب هذا الوطن وشعبه بمثل هذه السرعه؟ حجة الفلوس ... طب هى فين؟! يعنى ولا هما اتحاكموا ولا الفلوس رجعت!!!!! طيب مش عاوزين الفلوس بس عاوزين القصاص.
ثالثاً: أحداث ماسبيرو! ايه بقى ؟ وليه ؟ وفين؟ مفيش سؤال من ال3 دوول ليه إجابه صح عند أى حد ... ومن هنا بدأت القصه، قصة الجيش الجريح الذى يعتدى عليه من أبناء وطنه الذى ما انفك ان رآه ( حلوه ما انفك دى ) يوم جمعة الغضب فى الشوارع إلا واستقبله بالورود والأحضان؟!!!
رابعاً: أحداث محمد محمود، قناص العيون.. مين ؟ وإزاى ؟ فقالك فض الإشتباك فض وراح هووووووووووووب نازل فى النص. ماشى ، وبدأنا حياة العزله والأسوار.
خامساً: أحداث مجلس الوزراء، علشان كوووووره؟! لا والله مش تقول انه نط جوه يجيبها ! الضرب والسحل والحرق اللى حصلوا دوول علشان كوووووره؟ طيب ولا احنا ولا انتوا اللى حرقتوا المجمع العلمى (اللى السايس اللى بيركن العربيات فى الشارع اللى قدامه ميعرفش ده بتاع ايه أصلاً! ) طيب مين اللى حرقه؟! إى تى مثلاً؟ لأ ستيفن سبيلبيرج قاللى مش هو! وسكان كوكب زحل و المريخ أعلنوا عدم مسؤليتهم بالحادث! مممم أه يبقى العيال المتشرده اللى كانوا أصلا فى السجن هما اللى حرقوه! لأ يا أساتذه ده طرف ثالث!!!! طول عمرى أسمع وأعرف أن اى حاجه ليها طرف او طرفين إنما موضوع الطرف الثالث دى جديده، طب هو مين مش عاوزين نعرف اكتر من كيانه ايه؟ واحد ولا واحده؟ شعب ولا مرتزقه؟ جماد ولا حيوان؟
سادساً: نفسى أعرف مين المتهم فى كل ما سبق؟ بما إن النيابه بتفرج عن كل الناس اللى بتتمسك بعديها، طيب بيتمسكوا ليه أصلاً؟
سابعاً: المجلس العسكرى بقاله 10 شهور هو و الحكومات المعينه كلها مفيش مؤتمر بيطلع فيه إلا و ينوه عن الإقتصاد اللى مكنش موجود أصلاً أنه بيقع!!! طيب وانتوا مستنيين إيه؟! واحد بقاله 10 شهور سايب عربيته بتتصلح عند الميكانيكى وكل مره يسأله عليها فبيقوله عربيتك عماله بتبوظ يا أستاذ ( وهى أصلاً مش بتمشى أساساً ) !! فالمفروض انك هاتسيبله العربيه يخلص عليها ولا تاخدها و تحاول تنقذها عند ميكانيكى تانى ؟؟!! والميكانيكى الأولانى هاتقول عليه ايه؟ و المفروض لو هو خايف على العربية كان قالك خدها وديها عند حد تانى انا مش عارف أصلحها، بس هى مش عربيته علشان يخاف عليها أصلا و عاوز فلوس على حس العربيه وما خفى كان أعظم! بس إحتمال يقولك ما هى قعدتك دى هى اللى موقفه المراكب السايره مع انك مش قاعد على دماغه ولا هو شايلك على كتفه، دى عربيتك وحقك تخاف عليها وتفضل واقفله لحد مايخلص ده ان خلص... طيب طالما انت مش عارف تمشيها سيبها للى يعرف يمشيها لو انت خايف عليها.. وشماعة الإنتاج هى التى تعلق عليها الحكومه و المجلس فشلهم فى إدارة البلاد
ثامناً: إلى كل من هاجم الثوار، والسيدات، والبنات فى أحداث مجلس الوزراء.... هما مش دوول اللى كنت أكل شارب قاعد نايم جنبهم فى يناير؟ ساعتها كان عادى ودلوقتى ايه اللى نزلهم؟ البارانويا بدأت فى التفشى منذ أحداث مصطفى محمود للاسف مع ان مصطفى محمود نفسه لو كان عايش كان نزل التحرير ..
تاسعاً: مخطط خارجى لحرق البلد وهدمها فى 25/01/2012 !!!!! ممممم !!!!!! مصادفه تاريخية غريبه و عجيبه و قديمه وفريده من نوعها...
ألهذا التاريخ علاقه بما أعلن عنه مسبقا بقيام الثوار بأستكمال الثورة فى حال لم يتم تسليم السلطه للمدنيين؟ أهو أستبشار بأن من سيشاركون فى الثورة هم المخربون ويحق لكم التعامل معهم بأساليبكم التى عهدناها الفترة الماضية؟ هل سنرى يو 25 يناير القادم على قناة المحور سيد و هناء يستضيفون هؤلاء من تدربوا بالخارج لهدم البلاد ثايةً؟ شيت .
عاشراً: هل نغمة المخربون والمخططات السائده هى شماعة المماطله؟ ام شماعة الفشل؟
يا مثبت العقل و الدين يا رب
و دمتم والسلام ختام

الصفحه الخامسة : الثورة المضادة يشتد ازرها

الثورة المضادة بدأت تظهر وتتفشى وتحارب ثورتنا المجيدة، فيجب ان نكون لها بالمرصاد. فى السطور القادمة سوف اشرح لكم معنى الثورة المضادة وأساليبها و منهجيتها ونجاحتها على مر العصور. الثورة المضادة هى ثورة الرجوع للجذور او للأصل. ومعناها إعادة الاوضاع على ما كانت عليه و محاولة أي نظام قديم العودة إلي الساحة إما بالأشخاص أو بالسياسات، ويقوم بها ويخطط لها أتباع النظام المخلوع أو المستفيدون منه. فقياسا على ذلك ما يحدث هذه الايام فى بلدنا مصر من تحركات واسعه لفلول النظام السابق لاستعادة جزء ولو كان صغير من مكانتهم السابقه فإن دل على شىء فإنه يدل على مدى خطورة هذه التحركات على الثورة و على الشعب وبالتالى على مصر. الجزء الأخطر فى هذه التحركات العشوائية استخدام الشعب كسلاح بحيث يكون الشعب هو عدو نفسه، فبالرغم من ازاحة الستار عن الكثير من جرائم الفساد والسرقة فى الوقت الراهن، وفضح امر جميع المسئولين فى النظام السابق ، ما نلبس ان يطل علينا شخص ما ويذكر ان نظام مبارك وعهده افضل بكثير من ما تمر به البلاد حاليا. وهذا هو المطلوب، ان تشيع الفتنه بين ابناء الشعب الواحد بغرض الرغبة فى العودة للماضى لمجرد الخلاص من الحالة اللا أمنيه و الأنهيار الاقتصادى و الفوضى والتعصب والفتنه الطائفية الى آخره ... هذا يا شعب مصر اخطر ما تواجهون منذ 25 يناير الى الآن . هناك عدة دلالات لما ذكرت و سوف اقتصر فى الاشاره الى بعضها للتوضيح . أولا: حادثة كنيسة أطفيح ، لماذا فى عدم وجود الحماية الامنيه وفى احلك اوقات الغياب الأمنى لم يتم مساس اى كنيسه او مسجد او حتى معبد يهودى فى مصر ؟ مع انها الفرصه التى لا يمكن ان تتكرر فى تفجير او حرق او ارهاب اى فئه ؟ لماذا لم تظهر هذه الروايه الهزليه إلا بعد وقوع مقرات امن الدوله فى يد الشعب بيوم واحد ؟ ثانيا: ماحدث فى مباراة الزمالك و الإفريقى التونسى و هذا المنظر المؤسف المدبر من قبل فلول و مواليين النظام السابق و بالتحديد أمام تونس لإحداث فجوه جديده بيننا وبين دولة عربية شقيقة أخرى بعد الجزائر وهى من ساعدت المصريين فى الخروج من ليبيا آمنيين و عودتهم الى أرض الوطن سالميين . ومحدش يقولى ده شغب جماهير ولا ده جمهور الزمالك ابدا. انا مش زملكاوى وبقولكم جمهور الزمالك عمره ما يعمل كده ولا دى تصرفاته وبالذات بعد الثورة لأن الناس دلوقتى بقه عندها ما يكفى من الوعى لتقبل الهزيمه فى الرياضه. إزاى الناس دى دخلت ستاد القاهرة بالأسلحه دى فى وجود رجال الشرطة؟ و هل لتصريحات إبراهيم حسن بعد مباراة الذهاب علاقة بما حدث؟ هذا إن دل على شىء فإنه يدل على ان فلول النظام السابق ليست موجوده فى المجال السياسى فقط...

------------------------------------------------------------------------------------------

تاريخ الثورات المضادة على مر العصور ونتائجها :

• تولى المماليك حكم مصر عام 1250 بعد انقراض السلطنة الأيوبية، ولم يعتمدوا في كثير الأحيان، نظام الحكم الوراثي بل نظام التوافق من ناحية والانقلابات بين زعماء الكتائب من ناحية ثانية، وقد توالى واحدًا وأربعين سلطانًا مملوكيًا في ستة وأربعين ولاية، إذ إن عددًا من السلاطين قد خلعوا ثم عادوا إلى عروشهم؛ وقد قضى ثمانية وعشرين سلطانًا منهم اغتيالاً على يد المماليك أنفسهم، ما يعكس التنافس نحو السلطة وفقدان الاستقرار السياسي في طبقتهم


• الثورة الفرنسية عام 1789 لم تستطع أن تحقق أهدافها لأنها اعتمدت المحاكم الثورية لتصفية أبنائها مما أدي إلي تراجع التأييد لها، حتي استولي نابليون بونابرت علي الحكم بعد عشر سنوات من هذه الثورة، وكان حكمه قمعيا يتواري أمام نظام الحكم الملكي.


• وفي عام 1917 كانت الثورة البلشفية التي ووجهت بثورة مضادة لمدة أربع سنوات وأسفرت عن مئات الآلاف من الضحايا، وحرب أهلية أدت إلي تدخلات أجنبية، حيث ان في 20 ديسمبر اسس لينين لجانا استثنائية من شأنها مكافحة الثورة المضادة سميت في ما بعد (الشي كا) الامر الذي يعتبر كنقطة بداية لقضاء البلاشفة علي كامل اعدائهم ومعارضيهم حيث بدأت تلك اللجان الاستثنائية بممارسة الارهاب الجماعي ضد ممثلي الفئات الغنية والمتوسطة للمجتمع الروسي والمثقفين ورجال الدين والضباط المشتبه بمعاداتهم للسلطة الجديدة


• وفي ثورة إسبانيا عام 1936 استعان فرانكو بالمرتزقة المغاربة حتي يسيطر علي الحكم. - واستطاعت الثورة المضادة لثورة مصدق في إيران أن تعيد شاه إيران إلي عرشه عام 1951.

• وفي عام 1956 تصور بعض الباشاوات المصريين إمكانية عودة عقارب الساعة إلي الوراء وأجروا اتصالات بالسفارة البريطانية في مصر، لإعداد أنفسهم لاستلام السلطة بعد هزيمة جمال عبدالناصر المتوقعة إبان العدوان الثلاثي.

• ومن الثورات التي تعرضت لثورة مضادة أيضا ثورة شيلي في السبعينيات.

----- --------------------------------------------------------------------------------------- يجب علينا توعية الشعب بما يدور خلف الكواليس ، لكى نكون على الاتحاد دائما. لا تهزنا شائعة او تفرقنا فتنه وان نكون مع مصلحة هذا الوطن الذى حاربنا من أجله، و لسوف نظل نحارب كل من تسول له نفسه تفريق هذا الشعب او احداث فتنه بين ابنائه. سنظل معا حتى النصر.

الصفحه الرابعة : وبعدين؟

وبعدين؟ هل ستتحقق امانينا بأكملها ؟ هل سنرى فى يوم من الايام هذا المبارك وعائلته يحقق معهم او فى المحكمه خلف القضبان ؟ اتمنى ذلك، ولكن ... ! إلى الآن و رؤوس الفساد مازالت حرة طليقة ، وهم أقل منه منصبا وسلطه ونفوذ فما بالكم به ؟ ( س و ص و ع ) على رأى اختى نواره ، لسه عايشين بحرية وفى بلدنا مصر كمان .. يعنى لو كانوا هربوا كانت هتبقى مبلوعه شويه والتأخير هايبقاله عذر ... لكن دوول هنا فى مصر وازاى لحد دلوقتى مفيش ضدهم بلاغات ؟ ولو فيه لماذا لم تعلن ؟ ولماذا لم يتم التحقيق معهم بالرغم من تورط أسمائهم فى مذبحة الجمل وده مش كلامى لوحدى ده كلام من لجنة تقصى الحقائق كمان !!! هو فيه ايه بقى بالظبط ؟ حد يفهمنى.. أحنا عملنا ثورة ولا لأ ولا هما ماسكين حاجه على الجيش ولا ايه ؟ ازاى سرور و صفوت و عزمى لسه عايشين بحرية و معاهم كل حراساتهم و عربياتهم و فلوسهم ولا كأن حصل حاجه أصلا!! و ازاى كلب البحر قاعد فى شرم الشيخ ؟؟ فيه بعض الأخوه بدأوا حمله لجمع توقيعات لمحاكمة الثلاثى المذكور أسمائهم فوق ، ده لينك لصفحة التوقيعات وده لينك للجروب على الفيسبوك عاوزين نجمع أكبر عدد توقيعات من كل مصر خلينا نخلص على ابو فصاده و ابو قردان والقرنى وكلب البحر. خلينا نشيل صناديق الزباله اللى ريحتها فايحه عاوزين نبنى مصر على نضافه. يا ريت تنشروا لينك صفحة التوقيع على قد ما تقدروا.

الصفحه الثالثة : اللعبه القذره

عندما استخدم اساليب و طرق غير صحيحه و ملتويه لتشويه صورة الآخر ولفرض رأيى و وجهة نظرى، فهذا إن دل على شىء فإنه يدل على ضعف الهويه و حقارة الفكر وتدنيه وعدم اقتناعى بما ادعوا اليه. ما حدث بداية من يوم الخميس 17 مارس 2011 لهو من اغرب ما رأيت يضاف الى تاريخهم الملىء بالأساليب الملتويه و التطلع للسلطه وانتهاز الفرص و فرض الرأى والسلبيه عندما كانوا فى موقع اتخاذ القرار. ليه لابس دقن فى وشك ؟؟ مش عارف ، ليه بتقول ده واجب شرعى انك تقول نعم ؟؟؟ مش عارف ، ليه بتحاول تضرب اى حد معلق ((لا)) فى عربيته ؟؟؟ برده مش عارف ... فى الاول هابدأ بحاجه حصلتلى يوم الخميس ، وقفت فى إشاره لقيت واحد عمال يجرى ورا عربية قدام كده، وبعدين لقيته رمى ورقه جوه بعد صراع مع اللى سايق .. لما الاشاره فتحت و وصلت للمكان ده هديت شويه كده قلت اشوف ده ايه ولا بيعمل ايه ، لقيته راح مدينى ورقه عن ((نعم)) للتعديلات الدستوريه و بيقولى (( دى التعديلات التدستوريه وان شاء الله هاتقول نعم )) !! . انا الحمد لله كان ردى جاهز و ورق ((لا)) جنبى فقولتله (( طب خد انت ده وان شاء الله ربنا يهديك )) فبصلى اوى كده وقالى (( انا عاوز انصر الإسلام )) قولتله (( يعنى لو قلت ((لا)) هاتخش النار يعنى ولا ايه مش فاهمك و هاتنصره على مين ؟ و بسبب ايه ؟ )) كالعاده سابنى ومشى ... انا بقه عاوز افهم هو نصرة الدين فى التعديلات؟ وايه اللى دخل الدين فى التعديلات؟ وايه اللى دخل الدين فى السياسه اصلا؟ هما بيقولوا ايه؟ ويقولك اسحار !! و الماده التانيه فى الدستور !! هو انت لو قلت (( نعم )) و زى ما انت مقتنع ان هايتعمل دستور جديد ماحنا هانتعرض لموضوع الماده التانيه برده !!! و بعدين ما ساعتها هايكون تصويت مش عاجبك ارفض. لكن اتبع أساليب زى دى واحط ايدى فى ايد الحزب الوطنى علشان المصلحه (( هو مش الحزب ده اللى كانت قياداته بتعتقلكم و بتسحلكم ولا دى تمثيليه )) و علشان اقفل كل الابواب للديموقراطيه ابقى ماستحقش الشعر اللى فى وشى.
ببساطه كده انا اشرحلكم المخطط اللحيوى القادم ، هما موافقين على التعديلات وخلوها واجب شرعى علشان حاجتين : اول حاجه علشان التخلف اللى طالع بأسم الماده التانيه اللى عملت هسس للمسلمين و المسيحيين ، تانى حاجه علشان مجلس الشعب ( السلطه والكرسى ) لأن دلوقتى مفيش فى الساحه غير الإخوان و الوطنى ، وبعدين لما يجوا يغيروا الدستور هما بما أنهم هايكونوا فى مجلس الشعب هايرفضوا و تبقى كارثه لو هما اغلبيه لأن تعديل الماده بيقول علشان الدستور يتغير لازم موافقة مجلس الوزراء او (( موافقة 50% من أعضاء مجلس الشعب )) .. فهمتوا ولا ايه ؟؟؟
طيب الناس التانيه بقه اللى بتقول لأ علشان يعدلوا الماده التانيه بس، انا احب اقولهم (( من انتم ؟؟ ))
الناس التالته بقه بتوع الحزب الوطنى بتوع السكر و الزيت و ال 20 جنيه ، انتوا ريحيتكم فايحه ، و فايحه اوى و متفتكروش ان علشان لو ((نعم )) اكتر هاترجعوا مجلس الشعب تانى انتوا و الإخوان ، لا ... بعينكم
للتذكره بس :
الإخوان السلبيين ، قصدى الإخوان المسلمين في عام 2005، حقق الاخوان اختراقا تاريخيا بفوزهم ب 20% من مقاعد مجلس الشعب المصري. و فى فبراير 2006 حصلت كارثة عبارة السلام 98 ، تم تداول القضية على مدى 21 جلسة طوال عامين استمعت خلالها المحكمة لمسئولين هندسيين وبرلمانيين وقيادات في هيئة موانئ البحر الأحمر وهيئة النقل البحرى. وتم الحكم في قضية العبارة في يوم الاحد الموافق 27 يوليو 2008 ،, في جلسة استغرقت 15 دقيقة فقط تم تبرئة جميع المتهمين وعلى رأسهم ممدوح إسماعيل مالك العبارة ونجله عمرو الهاربان بلندن وثلاثة أخرون هم : ممدوح عبد القادر عرابى ونبيل السيد شلبى ومحمد عماد الدين .

الصفحه الثانية : هزليات دستورية

عندما تدعوا الناس للإستفتاء على التعديلات الدستورية التى من المفروض انها لدستور ليس له وجود ، كأنك تدعوا الناس لمشاهدة أفتتاح الفيلم الجديد للنجمين زكى رستم و محمود المليجى الله يرحمهم.
----------

القضيه فى التعديلات الدستورية ليست قضية المواد المعدله و لكنها قضية المواد المتربة التى عفا عنها الزمن وسقطت بسقوط النظام.
----------

لما توافق على دستور مبارك عدل فيه 32 ماده ، تبقى موافق على كلامه و رافض وجوده .. ساعتها احب انصحك بالتوجه لأقرب عياده نفسيه يا صديقى.
----------

اعتقد ان تعديلات الدستور كانت تبقى كويسة لو اللى هايستفتى عليها سكان كوكب زحل.
---------

المشكلة الحقيقية اللى انا خايف منها اصحاب النفوس الضعيفه اللى ليهم حق التصويت و معندهمش اى وعى بأى حاجه خصوصا مع وجود كلاب النظام السابق بره القضبان.
---------

ريحه نتنه، اه نتنه .. الدستور الجديد ريحة الفل ، الحرية ريحة الياسمين و التعديلات ريحة نتنه.
---------

كأنك يابو زيد ما غزيت، قلت نعم و للظلم حنيت ، ازاى ايدك تطاوعك ، ترجع للى فات برجليك.
---------

يا واخد القرد على تعديلاته ، بكره تروح التعديلات ويفضل القرد على حاله.
---------

هانعمل دستور جديد، طب أحلف ... وحياة ابو زحلف.
---------

التعديلات الدستورية ، كأنك تريد ان تقنع الناس بالإقلاع عن التدخين بعد وفاتهم بسرطان الرئه.
---------

عباس الضو قال لأ ( مقتبسه من الشيخ عادل صليب ).
--------

سعد زغلول قال مفيش فايده ... أكيد كان قصدته على التعديلات.
-------

الصفحة الأولى : التعديلات الدستورية

دى أول صفحه فى الكتاب الجديد ، صفحه عن التعديلات الدستورية و الأستفتاء عليهم يوم 19 مارس 2011 ..
أول سؤال عارف انه هايتسأل، و ده ماله اصلا بالإصلاح و البناء !؟
والإجابه بسيطه، علشان نبنى عمارة بنبنى من تحت ، نرمى الأساسات وبعدين نطلع بالعمارة.. و الدستور هو أساس كل شىء فى البلد، من غيره كـأن الناس نايمه عريانه من غير هدوم فى الشارع وفى عز البرد كمان.
طيب ايه حكاية التعديلات الدستورية دى؟ ويعنى ايه دستور اصلا ؟ و هل التعديلات دى كفايه ؟ واساسا احنا كنا عاوزينه يتعدل ولا يتغير؟
فيه حاجات هجاوب عليها ، وشوية وجهة نظرى ، و الباقى هاسيبه ليكم .
نبدأ بأول حاجه، يعنى ايه دستور ؟
الدستور هو القانون الأعلى الذي يحدد القواعد الأساسية لشكل الدولة (بسيطة أم مركبة) ونظام الحكم (ملكي أم جمهوري) وشكل الحكومة (رئاسية أم برلمانية) وينظم السلطات العامة فيها من حيث التكوين والاختصاص والعلاقات التي بين السلطات وحدود كل سلطة والواجبات والحقوق الأساسية للأفراد والجماعات ويضع الضمانات لها تجاه السلطة.
واحد هايقولى مش فاهم يعنى ايه برده الدستور؟
هاقوله ببساطه إن الدستور هو اتفاق او معاهده بين النظام و الشعب على شكل البلد فى الحكم والسياسه و الحقوق و الواجبات اللى لينا و اللى علينا.
طيب ايه هى السلطات العامه؟
السلطات العامه هى ( السلطه التشريعيه هى من تقوم بوضع و سن القوانين ، السلطه القضائيه هى من تقوم بفض المنازعات مستخدمه القوانين ، السلطه التنفيذيه هى من تقوم بتنفيذ وإعلان قرارات السلطه التشريعيه) يعنى الثلاث سلطات مكملين لبعض)

إيه موضوع التعديلات الدستورية دى ؟
التعديلات الدستورية هى تغيير شكل ومنهج بعض المواد الدستورية و تنقيحها الى صورة أفضل ويتم الموافقة عليها من خلال استفتاء شعبى

ايه المواد اللى تم تعديلها فى الدستور؟
المواد أرقام 75، و76، و77، و88، و93، و139، و148 من الدستور، بالإضافة إلى إلغاء المادة 179، وكذلك إضافة فقرة أخيرة للمادة 189
ومادتين جديدتين برقمي 189 مكرر، و189 مكرر "1" إلى الدستور

المواد دى كلها كانت بتقول ايه ولا مكتوب فيها ايه ؟

• الماده 75 : يشترط فيمن ينتخب رئيساً للجمهورية أن يكون مصريا من أبوين مصريين، وأن يكون متمتعا بحقوقه
  المدنية والسياسية، وألا تقل سنه عن أربعين سنة ميلادية .
  

التعديل : يشترط فيمن ينتخب رئيساً للجمهورية أن يكون مصرياً من أبوين مصريين وأن يكون متمتعاً بحقوقه المدنية والسياسية وألا يكون قد حمل أو أى من والديه جنسية دولة أخرى، وألا يكون متزوجاً من غير مصرى، وألا تقل سنه عن أربعين سنة ميلادية.

• الماده 76 : ينتخب رئيس الجمهورية عن طريق الاقتراع السري العام المباشر، ويلزم لقبول الترشيح لرئاسة الجمهورية أن يؤيد المتقدم للترشيح مائتان وخمسون عضواً على الأقل من الأعضاء المنتخبين بمجلسي الشعب والشورى والمجالس الشعبية المحلية للمحافظات ، على ألا يقل عدد المؤيدين عن خمسة وستين من أعضاء مجلس الشعب ، وخمسة وعشرين من أعضاء مجلس الشورى ، وعشرة أعضاء من آل مجلس شعبي محلي للمحافظة من أربع عشرة محافظة على الأقل ، ويزاد عدد المؤيدين للترشيح من أعضاء آل من مجلسي الشعب والشورى ومن أعضاء المجالس الشعبية المحلية للمحافظات بما يعادل نسبة ما يطرأ من زيادة على عدد أعضاء أي من هذه المجالس ، وفي جميع الأحوال لا يجوز أن يكون التأييد لأآثر من مرشح . وينظم القانون الإجراءات الخاصة بذلك آله .
  ولكل حزب من الأحزاب السياسية التي مضى علي تأسيسها خمسة أعوام متصلة علي الأقل قبل إعلان فتح باب الترشيح ، واستمرت طوال هذه المدة في ممارسة نشاطها مع حصول أعضائها في آخر انتخابات علي نسبة ( 3%) علي الأقل من مجموع مقاعد المنتخبين في مجلسى الشعب والشورى ، أو ما يساوى ذلك في أحد المجلسين ، أن ترشح لرئاسة الجمهورية أحد أعضاء هيئته العليا وفقا لنظامه الأساسى متى مضت علي عضويته في هذه الهيئة سنة متصلة علي الأقل .
  واستثناء من حكم الفقرة السابقة ، يجوز لكل حزب من الأحزاب السياسية المشار إليها ، التى حصل
  أعضاؤها بالانتخاب علي مقعد علي الأقل في أي من مجلسين في آخر انتخابات ، أن يرشح في أى
  انتخابات رئاسية تجرى خلال عشر سنوات اعتبارا من أول مايو 2007 ، أحد أعضاء هيئته العليا وفقا لنظامه
  الأساسى متى مضت على عضويته في هذه الهيئة سنة متصلة علي الأقل . وتقدم طلبات الترشيح إلى لجنة تسمى لجنة الانتخابات الرئاسية تتمتع بالاستقلال وتشكل من رئيس المحكمة الدستورية العليا رئيساً وعضوية آل من رئيس محكمة استئناف القاهرة وأقدم نواب رئيس المحكمة الدستورية العليا وأقدم نواب رئيس محكمة النقض وأقدم نواب رئيس مجلس الدولة وخمسة من الشخصيات العامة المشهود لها بالحياد يختار ثلاثة منهم مجلس الشعب ويختار الاثنين الآخرين مجلس الشورى، وذلك بناء على اقتراح مكتب آل من المجلسين وذلك لمدة خمس سنوات، ويحدد القانون من يحل محل رئيس اللجنة أو أي من أعضائها في حالة وجود مانع لدي ه .
  وتختص هذه اللجنة دون غيرها بما يلي :
  1- إعلان فتح باب الترشيح والإشراف علي إجراءاته وإعلان القائمة النهائية للمرشحين .
  2- الإشراف العام علي إجراءات الاقتراع والفرز .
  3- إعلان نتيجة الانتخاب .
  4- الفصل في آافة التظلمات والطعون وفي جميع المسائل المتعلقة باختصاصها بما في ذلك تنازع الاختصاص .
  5- وضع لائحة لتنظيم أسلوب عملها وآيفية ممارسة اختصاصاتها .
  وتصدر قراراتها بأغلبية سبعة من أعضائها علي الأقل وتكون قراراتها نهائية ونافذة بذاتها غير قابلة للطعن
  عليها بأي طريق وأمام أية جهة ، آما لايجوز التعرض لقراراتها بالتأويل أو بوقف التنفيذ ، ويحدد القانون المنظم للانتخابات الرئاسية الاختصاصات الأخرى للجنة . آما يحدد القانون القواعد المنظمة لترشيح من يخلو مكانه من أحد المرشحين لأى سبب غير التنازل عن الترشيح في الفترة بين بدء الترشيح وقبل انتهاء الاقتراع . ويجرى الاقتراع في يوم واحد وتشكل لجنة الانتخابات الرئاسية اللجان التي تتولي مراحل العملية الانتخابية والفرز على أن تقوم بالإشراف عليها لجان عامة تشكلها اللجنة من أعضاء الهيئات القضائية، وذلك آله وفقا للقواعد والإجراءات التي تحددها اللجنة . ويعلن انتخاب رئيس الجمهورية بحصول المرشحين على الأغلبية المطلقة لعدد الاصوات الصحيحة، فإذا لم يحصل أي من المرشحين على هذه الأغلبية أعيد الانتخاب بعد سبعة أيام على الأقل بين المرشحين اللذين حصلا على أآبر عدد من الأصوات، فإذا تساوى مع ثانيهما غيره في عدد الأصوات الصحيحة اشترك في انتخابات الإعادة.. وفي هذه الحالة يعلن فوز من يحصل على أآبر عدد من الأصوات الصحيحة .
  ويتم الاقتراع لانتخاب رئيس الجمهورية حتى ولو تقدم للترشيح مرشح واحد أو لم يبق سواه بسبب تنازل باقي المرشحين أو لعدم ترشيح أحد غير من خلا مكانه . . وفي هذه الحالة يعلن فوز المرشح الحاصل على الأغلبية المطلقة لعدد من أدلوا بأصواتهم الصحيحة ، وينظم القانون ما يتبع في حالة عدم حصول المرشح على هذه الأغلبية, ويعرض رئيس الجمهورية مشروع القانون المنظم للانتخابات الرئاسية علي المحكمة الدستورية العليا بعد إقراره من مجلس الشعب وقبل إصداره لتقرير مدى مطابقته للدستور . وتصدر المحكمة قرارها في هذا الشأن خلال خمسة عشر يوماً من تاريخ عرض الأمر عليها، فإذا قررت المحكمة عدم دستورية نص أو أآثر من نصوص المشروع رده رئيس الجمهورية إلى مجلس الشعب لإعمال مقتضي هذا القرار ، وفي جميع الاحوال يكون قرار المحكمة ملزماً للكافة ولجميع سلطات الدولة وينشر في الجريدة الرسمية خلال ثلاثة أيام من تاريخ صدوره .
  

التعديل : ينتخب رئيس الجمهورية عن طريق الاقتراع السرى العام المباشر. ويلزم لقبول الترشيح لرئاسة الجمهورية أن يؤيد المتقدم للترشح ثلاثون عضواً على الاقل من الاعضاء المنتخبين لمجلسى الشعب أو الشورى أو ان يحصل المرشح على تأييد ما لا يقل عن ثلاثين ألف مواطن ممن لهم حق الانتخاب فى خمس عشرة محافظة على الاقل بحيث لا يقل عدد المؤيدين فى اى من تلك المحافظات عن ألف مؤيد .
وفى جميع الاحوال لا يجوز أن يكون التأييد لأكثر من مرشح وينظم القانون القانون الإجراءات الخاصة بذلك كله . ولكل حزب من الاحزاب السياسية التى حصل أعضاؤها على مقعد على الاقل بطريق الانتخاب فى أى من مجلسى الشعب والشورى فى اخر إنتخابات أن يرشح أحد أعضائه لرئاسة الجمهورية. وتتولى لجنة قضائية عليا تسمى "لجنة الانتخابات الرئاسية " الإشراف على اننخابات رئيس الجمهورية بدءاً من الاعلان عن فتح باب الترشيح وحتى اعلان نتيجة الانتخاب. وتشكل اللجنة من رئيس المحكمة الدستورية العليا رئيساً وعضوية كل من رئيس محكمة استئناف القاهرة، وأقدم نواب رئيس المحكمة الدستورية العليا، وأقدم نواب رئيس محكمة النقض، وأقدم نواب رئيس مجلس الدولة. وتكون قرارات اللجنة نهائية ونافذة بذاتها غير قابلة للطعن عليها بأى طريق وأمام أيه جهة كما لا يجوز التعرض لقراراتها بوقف التنفيذ أو الألغاء كما تفصل اللجنة فى اختصاصتها يحدد القانون الأختصاصات الأخرى للجنة. وتشكل لجنة الانتخابات الرئاسية اللجان التى تتولى الاشراف على الاقتراع والفرز على النحوالمبين فى المادة 88. ويعرض مشروع القانون المنظم للأنتخابات الرئاسية على المحكمة الدستورية العليا قبل إصداره لتقرير مدى مطابقته للدستور. وتصدر المحكمة الدستورية العليا قرارها فى هذا الشأن خلال خمسة عشر يوماً من تاريخ عرض الأمر عليها فإذا قررت المحكمة عدم دستورية نص أو أكثر وجب اعمال مقتضى قرارها عند إصدار القانون وفى جميع الأحوال يكون قرار المحكمة ملزماً للكافة ولجميع سلطات الدولة وينشر فى الجريدة الرسمية خلال ثلاثة أيام من تاريخ صدوره.
ويجب موافقة أغلبية أعضاء مجلس الشعب على إعلان حالة الطوارئ.

• الماده 77 : مدة الرئاسة ست سنوات ميلادية تبدأ من تاريخ إعلان نتيجة الاستفتاء، ويجوز إعادة انتخاب رئيس
  الجمهورية لمدد أخرى .
  

التعديل : مدة الرئاسة اربع سنوات ميلادية تبدأ من تاريخ إعلان نتيجة الأنتخاب ولا يجوز إعادة انتخاب رئاسة الجمهورية إلا لمدة واحدة تالية.

• الماده 88 : يحدد القانون الشروط الواجب توافرها في أعضاء مجلس الشعب ، ويبين أحكام الانتخاب والاستفتاء ، ويجرى الاقتراع فى يوم واحد . وتتولى لجنة عليا تتمتع بالاستقلال والحيدة الإشراف علي الانتخابات علي النحو الذى ينظمه القانون ويبين القانون اختصاصات اللجنة وطريقة تشكيلها علي أن يكون من بين أعضائها أعضاء من هيئات قضائية حاليون وسابقون . وتشكل اللجنة اللجان العامة التي تشرف على الانتخابات علي مستوى الدوائر الانتخابية واللجان التي تباشر إجراءات الاقتراع ، والفرز على أن تشكل اللجان العامة من أعضاء من هيئات قضائية ، وأن يتم الفرز تحت إشراف اللجان العامة وذلك آله وفقا
  للقواعد والإجراءات التي يحددها القانون .
  

التعديل : يحدد القانون الشروط الواجب توافرها فى اعضاء مجلس الشعب ويبين احكام الأنتخاب والأستفتاء. وتتولى لجنة عليا ذات تشكيل قضائى كامل للأشراف على الانتخاب والاستفتاء ، بدأ من القيام بجداول الانتخاب وحتى اعلان النتيجة، وذلك كله على النحو الذى ينظمه القانون. ويجرى الاقتراع والفرز تحت اشراف اعضاء من هيئات قضائية ترشحهم مجالسها العليا ، ويصدر بإختيارهم قرار من اللجنة العليا

• الماده 93 : يختص المجلس بالفصل في صحة عضوية أعضائه. وتختص محكمة النقض بالتحقيق في صحة الطعون المقدمة إلى المجلس بعد إحالتها إليها من رئيسه. ويجب إحالة الطعن إلى محكمة النقض خلال خمسة عشر يوماً من تاريخ علم المجلس به، ويجب الانتهاء من التحقيق خلال تسعين يوماً من تاريخ إحالته إلى محكمة النقض. وتعرض نتيجة التحقيق والرأي الذي انتهت إليه المحكمة على المجلس للفصل في صحة الطعن خلال ستين يوما من تاريخ عرض نتيجة التحقيق على المجلس. ولا تعتبر العضوية باطلة إلا
  بقرار يصدر بأغلبية ثلثي أعضاء المجلس .
  

التعديل : تختص المحكمة الدستورية العليا بالفصل فى صحة عضوية أعضاء مجلس الشعب. وتقدم الطعون إلى المحكمة خلال مدة لا تجاوز ثلاثين يوماً من تاريخ إعلان نتيجة الانتخاب، وتفصل المحكمة فى الطعن خلال تسعين يوماً من تاريخ وروده إليها. وتعتبر العضوية باطله من تاريخ إبلاغ مجلس الشعب وقرار المحكمة

• الماده 139 : لرئيس الجمهورية أن يعين نائبا له أو أكثر، ويحدد اختصاصاتهم، ويعفيهم من مناصبهم. وتسرى القواعد
  المنظمة لمساءلة رئيس الجمهورية على نواب رئيس الجمهورية .
  

التعديل : يعين رئيس الجمهورية، خلال ستين يوماً على الاكثر من مباشرته مهام منصبة، نائبا له أو أكثر ويحدد إختصاصاته، فإذا إقتضت الحال إعفاؤه من منصبه وجب أن يعين غيره.

• الماده 148 : يعلن رئيس الجمهورية حالة الطوارئ على الوجه المبين في القانون، ويجب عرض هذا الإعلان على مجلس الشعب خلال الخمسة عشر يوماً التالية ليقرر ما يراه بشأنه. وإذا آان مجلس الشعب منحلاً يعرض الأمر على المجلس الجديد في أول اجتماع له. وفى جميع الأحوال يكون إعلان حالة الطوارئ لمدة محددة، ولا يجوز مدها إلا بموافقة مجلس الشعب .وتسرى الشروط الواجب توافرها فى رئيس الجمهورية والقواعد المنظمة لمساءلته على نواب رئاسة الجمهورية.
  

التعديل : يعلن رئيس الجمهورية حالة الطوارئ على الوجه المبين فى القانون ويجب عرض هذا الاعلان على مجلس الشعب خلال السبعة أيام التالية ليقرر ما يراه بشأنه. فإذا تم الاعلان فى غير دور الإنعقاد وجبت دعوة مجلس للانعقاد فوراً للعرض عليه وذلك بمراعاة الميعاد المنصوص عليه فى الفقرة السابقة. وإذا كان مجلس الشعب منحلاً يعرض الأمر على المجلس فى أول إجتماع له ولايجوز مدها إلا بعداستفتاء الشعب وموافقته علي ذلك.

• الماده 179 (تم إلغائها ) : تعمل الدولة على حماية الأمن والنظام العام فى مواجهة أخطار الإرهاب، وينظم القانون أحكاما خاصة
  بإجراءات الاستدلال والتحقيق التى تقتضيها ضرورة مواجهة هذه الأخطار، وبحيث لا يحول تطبيق تلك الأحكام الإجراء المنصوص عليه فى آل من الفقرة الأولى من المادة 41 والمادة 44 والفقرة الثانية من المادة 45 من الدستور دون تلك المواجهة، وذلك آله تحت رقابة القضاء. ولرئيس الجمهورية أن يحيل أية جريمة من جرائم الإرهاب إلى أية جهة قضاء منصوص عليها فى الدستور أو القانون.
  
• الماده 189 (تم إضافة فقره ): لكل من رئيس الجمهورية ومجلس الشعب طلب تعديل مادة أو أكثر من مواد الدستور، ويجب أن يذكر في طلب التعديل المواد المطلوب تعديلها والأسباب الداعية إلى هذا التعديل. فإذا كان الطلب صادراً من مجلس الشعب وجب أن يكون موقعاً من ثلث أعضاء المجلس على الأقل. وفى جميع الأحوال يناقش المجلس مبدأ التعديل ويصدر قراره في شأنه بأغلبية أعضائه، فإذا رفض الطلب لا يجوز إعادة طلب تعديل المواد ذاتها قبل مضى سنة على هذا الرفض. وإذا وافق مجلس الشعب على مبدأ التعديل، يناقش بعد شهرين من تاريخ هذه الموافقة، المواد المطلوب تعديلها، فإذا وافق على التعديل ثلثا عدد أعضاء المجلس عرض على الشعب لاستفتائه في شأنه. فإذا ووفق على التعديل اعتبر نافذاً من تاريخ إعلان نتيجة الاستفتاء .
  

الفقره الإضافيه : يجتمع الاعضاء غير المعينين لأول مجلسى شعب وشورى تاليين لإعلان نتيجة الأستفتاء على تعديل الدستور لأختيار الجمعية التأسيسية المنوط بها إعداد مشروع الدستور الجديد خلال ستة اشهر من انتخابهم وذلك كله وفقاً لأحكام الفقرة الأخيرة من المادة 189.

• الماده 189 مكرر : يمارس أول مجلس شورى بعد إعلان نتيجة الاستفتاء على تعديل الدستور بأعضائه المنتخبين إختصاصاته.
  ويتولى رئيس الجمهورية فور انتخابه إستكمال تشكيل المجلس بتعيين ثلث اعضاءئه ويكون تعيين هؤلاء لإستكمال المدة الباقية للمجلس على النحو المبين بالقانون. وتعرض هذه المواد الدستورية المعدلة على المجلس الأعلى للقوات المسلحة ثم تعرض على الشعب للاستفتاء .
  

كده انا خلصت ضميرى و قلتلكم اغلب اللى محتاجينه علشان الاستفتاء ،، فاضل أقولكم رأيى ولازم تعرفوا انه رأيى الشخصى و وجهة نظرى انا و انا مش بفرض رأيى على حد ولا عاوزه يأثر على دماغ حد ... اللى يقطنع ماشى واللى ميقطنعش برده ماشى احنا بقينا فى عصر الحرية..

رأيى إن التعديلات دى مرفوضه و ضحك على الدقون، ولو قبلنا بيها ساعتها أقدر أقولكم كأنك يابو زيد ما غزيت ... أنا شايف إن التعديلات الدستورية دى زى ما نكون جايبين خرقه مخرقه مليانه إخرام ورايحيين للترزى يخيطها ويعملهالنا بنطلون ..

أولا الأساليب الديمقراطية لنشأة الدساتير وهي تتم بإحدى طريقتين:

• الجمعية التأسيسية المنتخبة: حيث يتاح للشعب فرصة انتخاب ممثليه ليقوموا بهذه المهمة خصوصا، وأول من أخذ بهذا الأسلوب هي الولايات المتحدة الأمريكية بعد استقلالها عن بريطانيا سنة 1776م.
  
  
• الاستفتاء الدستوري: حيث يتم وضعه بواسطة جمعية نيابية منتخبة من الشعب أو بواسطة لجنة حكومية أو بواسطة الحاكم نفسه ثم يعرض على الشعب في استفتاء عام ولا يصبح الدستور نافذا إلا بعد موافقة الشعب عليه .
  

و طبعا ولا الطريقه الأولى ولا التانية حصلت لأننا بإختصار مش احنا اللى انتخبنا الناس اللى عدلت المواد الدستورية.

ثانيا الدستور يسقط بسقوط كل من : مجلس الشعب ( السلطه التشريعيه ) ، الحكومه ( السلطه التنفيذيه ) ، رئيس الدوله .. وكلهم سقطوا فالدستور بقه غير شرعى أصلا ..

ثالثا التعديلات نفسها مليانه صغرات وحاجات غامضه مش مفهومه ده انا اهو واحد ولا درست قانون ولا شغلى فى القانون وطلعت فيها اكتر من صغره و قلقان جدا من أجزاء كتير ، مثلا فى الماده 139 بيقول يعين الرئيس نائبا له ، بمزاجه يعنى .. يعنى فرصه لعمر سليمان جديد فى الظهور.. و الرئيس لو حصله حاجه يمسك هو ، لا ده كان زمان .. الرئيس او النائب لازم يكونوا منتخبين مش كل واحد يجيبلى اللى على مزاجه..... حاجه تانيه مثلا فى الماده 148 بيقول من حق الرئيس إعلان حالة الطوارىء و مجلس الشعب هو اللى يقرر فى خلال 7 ايام، انهى طوارىء بقه بالظبط ؟؟؟؟؟؟ وبعدين انا مش لاقى اى ماده تانيه فيها الجزء اللى قاله عليه ان قانون الطوارىء هايكون بحد اقصى 6 شهور و باستفتاء شعبى !!!!! الأستفتاء علشان لو هاتزيد المده عن 6 شهوووور لكن إعلان قانون الطوارىء ملهوش استفتاء شعبى يعنى رجعنا لنقطة الصفر تانى ... وبعدين مبارك من ساعة 1981 لحد 2011 عدل 34 ماده واحنا رايحيين أستفتاء على 10 مواد مش كلها كمان ضمن ال34 ماده ، ادونى عقولكم يعنى ...

انا بقول كفايه كده وكل واحد بعد ما قرأ وعرف و فهم يختار اللى شايفه صح ..